“დღეს საქართველოს ჰყავს ღიად პრორუსული ხელისუფლება, რომელიც უპირისპირდება დასავლეთს და ცდილობს რომ ქართველ ხალხს წაართვას ევროატლანტიკური არჩევანი” – ასე გამოეხმაურა ფრაქცია „ნაციონალური მოძრაობის“ თავმჯდომარე თინა ბოკუჩავა ამერიკის შეერთებული შტატების ელჩის, რობინ დანიგანის განცხადებას იმასთან დაკავშირებით, რომ აშშ-საქართველოს ურთიერთობის შესახებ დეზინფორმაცია ვრცელდება, თითქოს ამერიკა არის „გლობალური ომის პარტია“, რევოლუციის წახალისებას ცდილობს და აქვს ბოროტი ზრახვები, რისი მოსმენაც გულდასაწყვეტია.
ბოკუჩავა ამბობს, რომ ხელისუფლება ცდილობს საქართველოს ევროატლანტიკური მომავალი წაართვას.
„ის, რომ დღეს საქართველოში რუსული პროპაგანდის მთავარი ინსტრუმენტი საკუთარი ხალხის წინააღმდეგ არის ივანიშვილის მთავრობა, არის სწორედ ერთ-ერთი მიზეზი, რის გამოც ამერიკის შეერთებულმა შტატებმა მიმართა ისეთ უკიდურეს ზომას მეგობრებთან ურთიერთობაში, როგორიც არის სანქციების დაწესება კონკრეტულად იმ პირებზე, რომლებიც, მათ შორის, პროპაგანდის გამოყენებით და ასევე, ძალადობით, ცდილობენ, ძირი გამოუთხარონ ქართულ დემოკრატიას და საქართველოს წაართვან ევროატლანტიკური მომავალი“ – განაცხადა ბოკუჩავამ.
მან ასევე, ისაუბრა პრეზიდენტ ზურაბიშვილის მიერ „საარჩევნო კოდექსში“ ცვლილებებისთვის ვეტოს დადებას და აღნიშნა, რომ გადაწყვეტილება სწორია.
„საარჩევნო ცვლილებები, რომელიც ივანიშვილის პარტიამ მიიღო, არის მორიგი მცდელობა პოლიტიკურ ვერტიკალს დაუქვემდებაროს საარჩევნო ადმინისტრაცია, რაც, რა თქმა უნდა, არის უკან გადადგმული ნაბიჯი საქართველოს დემოკრატიული და ევროპული განვითარების თვალსაზრისით. ამიტომ, ნამდვილად გამართლებულია და სწორია პრეზიდენტ ზურაბიშვილის მხრიდან აღნიშნული საარჩევნო კანონმდებლობისთვის ვეტოს დადება“ – განაცხადა ბოკუჩავამ.
პარლამენტს „საარჩევნო კოდექსში“ ცვლილებებზე პრეზიდენტის მოტივირებული შენიშვნები წარედგინა
